Ալավերդի համայնքում աղբահանություն ու սանիտարական մաքրում իրականացնող մեքենամեխանիզմները փոքրաթիվ են, ինչը բարդացնում է գործընթացը և բավականին ծախսատար է: Ձմեռային սեզոնին համայնքին պատկանող 1 տեխնիկայով հնարավոր չի լինում ամբողջությամբ ձյունից մաքրել ներհամայնքային ճանապարհները` այդպիսով հնարավոր չի լինում ապահովել բնակչության և զբոսաշրջիկների համար անվտանգ ու անխափան երթևեկություն: Առկա այս իրավիճակը և պայմանները հաշվի առնելով համայնքապետարանը արդեն իսկ համայնքի համար երկու նոր աղբատար մեքենաների է ձեռքբերել: Սակայն դա բավարար չէ, ինչի պատճառով համայնքապետարանը նախապատրաստել է այս ծրագիրը, որով նախատեսվում է նպաստել համայնքում զբոսաշրջության զարգացմանը՝ համայնքին մաքուր և բարեկարգ տեսք տալու միջոցով, միևնույն ժամանակ ապահովելով համայնքի սեփական եկամուտների աճ՝ տեխնիկաները վարձով տրամադրելու և դրանցով ծառայություններ մատուցելու միջոցով:
Բացի վերոնշյալից, զբոսաշրջության զարգացման համար նախատեսվում է համայնք այցելող զբոսաշրջիկներին առաջարկել մի շարք ծառայություններ, այդ թվում արշավներ՝ ներկայացնելով համայնքում առկա մի շարք պատմական և ճարտարապետական հուշարձաններ, մշակութային կոթողներ ու բնության հուշարձաններ: Արշավային ուղին իր մեջ ներառելու է ՅՈՒՆԵՍԿՕ-ի համաշխարհային ժառանգության ցանկում ներառված երկու վանական համալիրները միմյանց կապող ավելի քան 800 տարվա վաղեմություն ունեցող 3,3 կմ երկարությամբ ճանապարհը: Դեպի Սանահինի վանական համալիր տանող 2 կմ երկարությամբ արահետի մի մասում նախատեսվում է կառուցել դիտակետ-պատշգամբներ՝ զբոսաշրջիկի առջև բացելով անկրկնելի տեսարան դեպի համայնքի գեղատեսիլ վայրեր և 250 տարվա պատմություն ունեցող պղնձի մշակման գործարան: Արահետների 2 կմ երկարությամբ հատվածը կցանկապատվի, կկահավորվի արևային էներգիայով աշխատող լույսերով, զբոսախնջույքի տեղերով և նստարաններով: Նստարաններով նախատեսվում է կահավորել ոչ միայն այս արահետը, այլ նաև համայնքը, քանի որ ոչ տուրիստական գործակալությունների միջոցով համայնք այցելող զբոսաշրջիկները նաև զբոսնում են համայնքում և նստելու, հանգստանալու համար չկան բավարար նստարաններ և աղբամաններով:
Արշավային ուղղու 2 հատվածներում կտեղակայվեն հեծանիվի վարձույթի 2 կետեր (Աքորի գյուղում և Սանահինի Քարե կամուրջի տարածքում, յուրաքանչյուրում 10 հեծանիվ)՝ առաջարկելով զբոսաշրջիկին արշավի մի մասը կազմակերպել հեծանիվներով:
Նախատեսվում է արահետների բարեկարգման աշխատանքների մի մասը իրականացնել ծրագրով ձեռք բերվող տեխնիկաներով:
Համայնքի համար լրացուցիչ եկամուտ ապահովելու համար, իրենց հիմնական նպատակին ծառայեցնելուց բացի վերոնշյալ տեխնիկաները շուկայականից ցածր գնով վարձով կտրամադրվեն այլ համայնքաներին, մասնավոր հատվածի կազմակերպություններին և անհատներին, ինչպես նաև դրանց կիրառմամբ, համապատասխան վճարներով, ծառայություններ կմատուցվեն կազմակերպություններին, անհատներին և հարակից համայնքներին: Համայնքը նաև հնարավորություն կունենա խնայել բյուջետային միջոցներ, քանի որ ամեն տարի ստիպված չի լինի մեծ ծախսեր կատարել հին տեխնիկայի վերանորոգման համար կամ վարձակալել ծրագրով նախատեսվող ամբողջ տեխնիկան՝ իր կոմունալ կարիքները բավարարելու համար: Ծրագրի շրջանակներում ձեռք բերված տեխնիկաները կկայանվեն «Ալավերդի համայնքի Կոմունալ տնտեսություն» ՀՈԱԿ-ի տարածքում:
ՀՈԱԿ-ը ունի համապատասխան տեխնիկայի արդյունավետ շահագործման փորձ և ձեռք բերված տեխնիկան կօգտագործի արդյունավետ:
Ծրագրի շահառուներն են Ալավերդի խոշորացված համայնքի ողջ բնակչությունը (24599 մարդ), Ալավերդու համայնքապետարանը, Ալավերդի համայնքում գործող դպրոցները, մանկապարտեզները, հիվանդանոցը, Ալավերդի համայնքում գործող հյուրանոցները և հյուրատները, համայնք այցելող տեղացի և օտարերկրացի զբոսաշրջիկները, Ալավերդի համայնքում ներդրումային ծրագրեր իրականացնող և ապագայում ներդրումային ծրագրեր իրականացնելու մտադրություն ունեցող գործարարները: Թվարկված շահառուների պլանները սերտորեն կապվում են սույն ծրագրի հետ, նրանք պատրաստակամ են մասնակցելու և աջակցություն ցուցաբերելու ծրագրի իրականացմանը: